Aarɔn "nynuu 'sɔɔn Nyɔsoa 'a nɛ dia
10
'De Aarɔn 'ɔ ''nynuu "klu, Nadabʋ ke Abiʋ "duɛ ʋʋa' paifɛn' "jri podɛ 'ʋn, ʋʋ ‑sa nɛ ‑ta -deejrɔ' ʋʋ poɛ 'e, -wɛe ʋʋ poɛ paifɛn' "kpei. 'Kamɔ ʋʋ nʋ ‑wɛe ʋʋ ja nɛ 'srʋ 'de Nyɔsoa ''juɛi, ɛ ke dɛ Nyɔsoa "sia 'nynɩ 'de ʋʋ -pee 'dee- se due' nɩ. 2 ‑Flai, 'sʋ nɛ 'wlʋɛ 'e Nyɔsoa "juɛi ɛ di ʋʋpʋ‑ 'mɛ 'mʋʋa‑ de 'bo ʋʋpʋ‑ 'mɛɛ‑. 3 Moisɩ wlu 'de Aarɔn ‑pee: Dɛ Nyɔsoa 'tmu -a -pee sese ɛ 'na: Nyʋ "klein ‑ʋʋa ‑kpa 'ʋn ‑pʋn" ɛ, ʋʋa muɛ 'ma i ‑kwɛa 'a ni' ‑tea', ‑wɛe 'ɩn 'je 'ma kɛɛma' dɛ to 'blʋa ‑wee' 'jeɛ 'je. Aarɔn seɛ wlu "kpei po. 4 Moisɩ 'da Mikaɛ ke Elisafan, ‑ʋʋ ‑nɩa Aarɔn 'ɔ "bo 'a "dei Usiɛlɩ 'a ''nynuu‑, ‑wɛe ɔ wlu ʋʋ ‑pee ɔ 'na: Ao ji ao 'je aoa' dedi' ‑wi" ‑ta ‑kwɛai ‑ta ‑sa, ao 'je ʋʋ dɛkpɔ 'de kpa. 5 Ʋʋpʋ 'kpa 'e 'mɛ, ‑wɛe ʋʋ sie 'de ʋʋa "bai ‑tɔɔn' ‑tɔɔn 'di ‑wɛe ʋʋ kpa ʋʋpʋ 'de dɛkpɔ 'de, ka Moisɩ "sia 'nynɩ ɛ. 6 'De -mɛ 'de ɛ, Moisɩ wlu' 'de Aarɔn ke, ɔɔ' "nynuu Eleasar ke Itamar ‑pee: Ao 'bo aoa' "mɩɩ‑ kan i ɛ, ao 'bo aoa' "wliiɛ‑ 'fae ɛ, ‑wɛe ao mɔ -je 'mɛ ‑ke, 'de ao je Nyɔsoa 'a 'cɛn 'blʋa ‑wee' "klein "kpei ja-. 'Kaa aoa' dedi' Israɛ nyʋ ‑wee'‑, ‑ʋʋa mu nyʋ Nyɔsoa poa "jri 'mʋʋa‑ ‑fɩn'' 'a. 7 'Kaa ao mɔ ɛ, ao se -tan 'tan ‑ɛɛ ‑sɔn nyʋ ke Nyɔsoa 'a ‑gbʋʋn' a "jʋɛi 'wlʋ i, ‑bo ɛ se ‑mɛ nɩɛ aoa muɛ 'mɛɛa, dɛ dɛ‑nʋɛ' mɛ ‑nɩ aoa poɛ Nyɔsoa 'a 'cna "jru. Aarɔn ke ɔɔ' "nynuu se Moisɩ 'a wlu ‑saa.Kpaan nmɔ 'ɔ kɛ'
8 Nyɔsoa wluɛ 'de Aarɔn ‑pee ɛ 'na: 9 ‑Bo ‑ɩn ‑ke -ma "nynuu 'jee -tan 'tan ‑ɛ ‑sɔn nyʋ ke Nyɔsoa 'a ‑gbʋʋn' a "i 'di pa a, ao se -difin'a ke nmɔ kmai" 'na i, ‑wɛe ‑bo ɛ nɩ 'kan ao je 'mɛ. Ɛɛ' kɛ' tu nɩɛ aoa' "ji 'a kɛ' 'de "nɔ "o "nɔ -wee' 'di. 10 Dɛ dɛ‑nʋɛ' ɛmɛ ‑nɩ ao 'je dɛ ‑kwɛai ke, dɛ ‑sea i ‑kwɛ 'ɛ "kpei ‑seea ka juo-, dɛ -kpʋan -flɛn" ke dɛ ‑sea ‑flɛn" ‑pʋn" nɩ 'a "kpei ‑sea ka juo. 11 ‑Bo ɛ nɩ 'kan ‑mɛ ao 'bɛɛ nɛ, ao 'je kɛ' "klein 'ɩn jaa Moisɩ 'kwa, ‑wɛe ɔ bla ɔ "nyɩa Israɛ nyʋ 'a tɔɔ ka nɩ-.
'Sraadɛ 'ɛ nmi- 'a kɛ'
12 Moisɩ 'wlu 'de Aarɔn ke Eleasar ke Itamar ‑ʋʋ -nɩa Aarɔn ɔ' "nynuu sia 'emu ‑pee: Ao "duo 'sraadɛ -wlʋa 'de 'blʋ 'ʋn nyʋ "nyɩa Nyɔsoa 'a tɔo ‑sia e mu 'ʋn, ɛɛ' ‑jɛ nɛ sea di, -bo ao piɛ -mɛ ‑puun" dɛ 'boɛ o nɩɛ, ‑wɛe ao 'jeɛ di 'de "kpa ‑pʋn", dɛ dɛ‑nʋɛ' ɛɛ' dɛtu ‑kwɛ i 'pepe. 13 Aoa muɛ dia' 'de ‑ta ‑kwɛai ɛ, dɛ dɛ‑nʋɛ' ɛmɛ ‑nɩ ‑mɔ o, ‑ma "nynuu o, aoa' dina' ‑o, 'de 'sraadɩ Nyɔsoa 'a nɛ dia' "kpei, 'kamɔ ɛ blɛɛ' kɛ' ɛ "nyɩ 'ʋn. 14 'De ɛɛ' -kwli" ‑pʋo nyɔ ɔ ‑fuuan" i, ɛ ke ɛɛ' bʋ nyɔ ɔ "nyɩa Nyɔsoa ‑ke ɛ, ‑ɩn bɛɛ' ‑ɩn ‑ke ‑ma "nynuunmai ke, ‑ma "nynuu nynɔkpae' 'jeɛ di 'de ‑ta ‑nɩa 'pepe, ɛ nɩɛ aoa' ‑nɩ dina' nyʋ "nyɩa aopʋ ‑o, ‑ɩn ‑ke ‑ma "nynuu ke, 'de Israɛ -nyʋ ke Nyɔsoa 'a wlu "kpei ‑seea' sraa 'a dɩ "kpei. 15 'De 'cna nɛ ɩa' di 'mʋʋa‑ "kpei ɛ, nyʋ ‑ʋʋ jia 'sraa ‑saa' 'mʋʋa‑ a muɛ ɛɛ' bʋ ke ɛɛ' -kwli" -puo jaa', -bo nyʋ -fʋʋɩn" i 'de Nyɔsoa "juɛi ɛ, ‑bo ɛ ‑kwɛi" ɛ ‑mɛ ɩ 'kpa ‑ɩn ‑ke ‑ma "nynuu a dɛ, ka Nyɔsoa bla ɛɛ' kɛ', ‑wɛe nyʋ 'jeɛ wɔn 'je, 'de nɔ" "oo nɔ" ‑wee' 'di. 16 'De ‑mɛ 'de ɛ, Moisɩ ‑teeɛ' gbao nyʋ ‑saa dɛsaʋn 'a 'sraa 'a ‑pʋn" ‑tɩ i, "jaa ɛ poɛ "jri. 'Sʋ ɔ 'kpa 'cɛn 'de Eleasar ke Itamar ‑ʋʋ ‑nɩa Aarɔn ɔ "nynuu ‑sia 'e "kpei, ɔ ‑teɛ ʋʋpʋ i: 17 Dɛɛ ‑tɩ ao se nmi ‑ɛ ‑saa dɛsaʋn 'a 'sraa di 'de ‑ta -tea kpɔ "i ɛ-? Ɛ nɩɛ dɛ -kwɛai 'pepe o-, Nyɔsoa "nyɩ aopʋ 'mɛ ‑wɛe ao 'je ʋʋa' dɛsaʋn 'a ‑gbɛ 'ble, 'de ao 'je ʋʋa' dɛsaʋn 'a ‑kwɛa' 'sraadɛ to 'de Nyɔsoa "juɛi. 18 Ɛɛ' 'sraadɛ 'ɛ nmɔ se 'e Nyɔsoa ‑gbɛɛna' ji, -mɛ ao di ɛɛ' nmi 'de ‑ta ‑kwɛai, ka 'ɩn blɛ ɛɛ' kɛ' ɛ. 19 Aarɔn 'wlu 'de Moisɩ ‑pee ka: ‑Ɩn ‑gbʋn, ‑sɩan ‑ta mɛ Israɛ -nyʋ to ʋʋa' dɛsaʋn 'a -kwɛa' 'a 'sraa ɛ ke 'sraa ɛ -wee' nɛ dia 'de Nyɔsoa "juɛi, ‑wɛe dɛ ‑nʋʋa 'ʋn "jrii ‑ɩn ‑juɛ'. 'De 'wɩ due' koun ‑nɛ 'di ‑bo 'ɩn di dɛsaʋn 'a ‑kwɛa 'sraa nmi 'de ɛ, ɛ 'je Nyɔsoa "jri 'dei nmɔɔ‑ o-? 20 Dɛ ɔ 'tmʋa Moisɩ wɔɔn 'e 'wɛ.